Antwort
von
nach 17 Stunden
0
hilfreich
Re: de rechtschriben
moin moin ol Fründ -
du sühst jo sülben: Plattdüütsch leewt, un wieldat dor Leeben in steekt, verännert sik de Sprak ok heel un deel. Un dat´s ok gaud so.
Ik heww di al seggt, dat min eegen Mundoart, min Platt, mit de Tied - ik bün je keen jungen Kerl mehr - een beeten mit dat Platt vermischt hett, wat se hier an´t Snacken sünd: mennigeen meckelnborgsche Wöör sünd in min Sprakschatz opnahmen. So is ut dat "o" een "au" worden, ut "to" ward "tau" - un "Metten" hewwt nix mit de Mettwuss tau doon, sünners dat sünd - op hoochdüütsch - "Regenwürmer" :-)
Ne, an "de" rechte Schriwwies hol ik mi ok nich, dor hess recht. Dat giwwt so mennig veel dorvun; elkeen Dörp hett dor sien eegen Schriwwies.
Ik speel nu al siet öber 25 Johrn Theoter - plattdüütsches Theoter - un wi hewwt al mennigmol keeken, wat de Author vun een Stück nu wedder mol een Wöör schreeben hett, wat wi hier nich kennt.
So seggt taun Bispill de Hamborger Lüüd "Süster" - hier heit dat "Swester"; de Kark heit hier bi uns "Kirch", un "Sibbeln" kennt se hier ok nich - hier heit dat "Zwiebeln"... Bloot wat "Wruken" sünd, dat weiten de Hamborgers nich, man hier weit se all Bescheed: dat sünd "Meckelnborger Ananas" - Zuckerrüben! ....
So, min Fründ, nu hol di fuchtig - hett ok nix mit "feucht" tau doon, anners mütt dat jo heiten: Mok di man nich natt *g* - wor di, wenn een Fru "fuchtig" warrd, dennso müsst du gau wegloopen ... is beter för di!
Dor fallt mi noch wat in: wenn een Hochdüütschen öbersetten schall, wat "die Uhr ist halb zwei" woll op Platt heit und hei denn stolt seggt: "de Klock is halbig twei" - denn schüttkoppt de Plattdüütsche un seggt tau em: "denn pass man op, dat se nich ganz twei geiht..."
Un noch wat: de Ünnerscheed twüschen Platt un Hochdüütsch wiest di düsse lütte Geschicht: Löppt dor twei hochdüütsche Jungs achter een ol Fru achterran, un de Olsch hett scheebe Been. Dunn seggt de een Jung tau sin Fründ op hochdüütsch: "Nu sieh doch mal bloß, was die alte Dame für krumme Beine hat!" - dat is nich grad charmant, nich?
Kunn sien, dat dat nu twei plattdüütsche Jungs weern, un de harrn dat anners utdrückt: "Nu kiek di mol düsse arme Madam an - die kunn ok keen Farken griepen.." (die kann auch keine Ferkel greifen - geht ja auch schlecht bei O-Beinen) un denn seggt de anner: "Ne, de hett de Beens je woll op´n Fatt dröögt..." (Sie hat ihre Beine wohl auf einem Fass getrocknet - und dabei sind sie eben krumm geblieben..)
Na denn tschüss solang!
Hubert
